Kanada dolları (CAD) son günlərdə bir qədər zəifləyib, buna səbəb kimi Liberal Partiyanın seçkilərdə qalib gəlməsinə baxmayaraq parlamentdə əksəriyyəti əldə edə bilməməsi göstərilir.
Banker.az-ın İnvestisiya bölməsi bu barədə foreksdəki göstərilərə istinadən xəbər verir.
Müşahidəçilərin fikrincə, Baş nazir Mark Karneyin rəhbərlik etdiyi Liberal Partiyanın parlamentdə əksəriyyəti qazana bilməməsi onun siyasətlərini həyata keçirmək üçün Yeni Demokratik Partiya (NDP) və ya “Bloc Quebecois” kimi kiçik partiyaların dəstəyinə möhtac qalmasına səbəb olacaq. Bu da iqtisadi və fiskal siyasətlərdə əlavə güzəştlərin edilməsini tələb edə bilər.
“Commerzbank”ın analitiki Mixael Pfister qeydində bildirir ki, valyutanın zəifləməsi, əsasən, Liberal hökumətin azlıqda olması və buna görə də qanunvericilik təşəbbüslərini həyata keçirməkdə çətinliklərlə qarşılaşması ilə bağlıdır.
ƏSAS DİQQƏT…
“ING”dən Frankesko Pesole isə bildirir ki, uzunmüddətli perspektivdə Kanada dollarının taleyi ABŞ ilə ticarət danışıqlarının nəticəsindən asılı olacaq. Onun sözlərinə görə, Baş nazir Karney Prezident Trampın tarif siyasətinə qarşı sərt mövqe tutacağını və Avropa ölkələri ilə daha sıx əməkdaşlığın danışıqlarda çətinlik yarada biləcəyini bildirib. Əsas diqqət ABŞ-Meksika-Kanada Ticarət Sazişinin yenidən müzakirəsinə yönələcək.
“Capital Economics”dən Stefan Braun isə Liberal Partiyanın hakimiyyətdə qalacağı və yumşaq stimullaşdırıcı siyasət aparacağı proqnozunu əvvəlcədən verdiyini bildirib. O, Kanada iqtisadiyyatının kəskin yavaşlayacağını, lakin resessiyadan yayınacağını gözləyir. Bununla belə, o qeyd edir ki, azlıq hökuməti şəraitində digər partiyalara ediləcək fiskal güzəştlər daha geniş büdcə xərclərinə səbəb ola bilər və bu, Kanada Bankının gözlənilən faiz endirimlərini üç dəfə həyata keçirməsinə mane ola bilər.
Hazırda ABŞ dolları 0.1% bahalaşaraq 1.3837 Kanada dollarına çatıb. ING analitikləri isə bu göstəricinin ikinci rübün sonuna qədər 1.39-a yüksələcəyini proqnozlaşdırır.
