“Goldman Sachs” analitiklərinin fikrincə, Avropa İttifaqının Rusiya neftinin idxalına tam qadağa qoyması “çox az ehtimal olunur”. Bildirilir ki, bloka daxil olan bir neçə ölkənin — xüsusilə Macarıstan və Slovakiyanın — Rusiya tədarükündən güclü asılılığı səbəbindən bu təşəbbüsü dəstəkləmək üçün motivasiyası “çox aşağıdır”.
Tam qadağa Aİ-nin Rusiyaya qarşı 19-cu sanksiya paketinə daxil edilməyib, baxmayaraq ki, ABŞ prezidenti Donald Tramp ittifaqı Rusiyadan enerji daşıyıcıları almağı dayandırmağa çağırıb. Lakin hətta belə bir qadağa qüvvəyə minəcəyi halda belə, onun qlobal bazar balansına təsiri “məhdud” olacaq, çünki Rusiya nefti sadəcə olaraq başqa istiqamətlərə yönləndiriləcək, həcmlər isə azalmayacaq.
Hazırda Rusiya Avropanın dəniz yolu ilə idxal etdiyi neft və kondensatın 17%-ni (gündə 1.9 milyon barel), neft məhsullarının isə 10%-ni (600 min barel/gün) təmin edir. Bankın ekspertləri qeyd edir ki, bu həcmləri digər istehsalçılar əvəz edə bilər.
