ABŞ-nin ən böyük bankı “JPMorgan Chase” institusional müştərilərə kredit almaq üçün birbaşa bitkoin və Ethereum-u girov kimi istifadə etməyə icazə verməyi planlaşdırır, “Bloomberg” yazır. Proqramın ilin sonunadək işə düşəcəyi və qlobal miqyasda əlçatan olacağı gözlənilir.
Kryptovalyutalar üçüncü tərəf kastodian şirkətində saxlanılacaq. Yeni xidmət bankın artıq mövcud təcrübəsini genişləndirir — iyun ayında “JPMorgan” kredit təminatı kimi kryptovalyuta ETF-lərinin səhmlərini qəbul etməyə başlamışdı.
“JPMorgan”ın rəhbəri Ceymi Daymon kryptovalyutalara qarşı skeptik mövqeyini qoruyur — o, bitkoini dəfələrlə “cinayətkarlar üçün alət” adlandırıb. May ayında investorlarla görüşdə o, bankın buna baxmayaraq müştərilərə kryptovalyutaya çıxış imkanı verəcəyini bildirib.
“Mən düşünmürəm ki, siqaret çəkməlisiniz, amma bu hüququnuzu əlinizdən almıram. Bitkoinlə də eyni məsələdir”, — Daymon o zaman bankın planlarını şərh edərkən demişdi.
