Dünyanın ən böyük kriptovalyuta platformalarından biri olan “Coinbase”in baş direktoru Brayan Armstrong bitkoinin 2030-cu ilə qədər 1 milyon dollara çatacağını proqnozlaşdırıb, baxmayaraq ki, kriptovalyuta son maksimum səviyyə ilə müqayisədə təxminən 30% dəyər itirib.
“Düşünürəm ki, bu kriptovalyutanın böyük artım potensialı var. <…> Mən hələ də hesab edirəm ki, 2030-cu ildə bitkoinin qiyməti bir milyon dollar olacaq”, — deyə Armstrong “Abu Dhabi Finance Week” iqtisadi forumu çərçivəsində “The National” nəşrinə verdiyi müsahibədə bildirib.
2012-ci ildə ABŞ-də təsis edilmiş “Coinbase” kriptobirjasının rəhbərinin sözlərinə görə, investorlar kriptovalyuta bazarındakı qısamüddətli dalğalanmalara çox əhəmiyyət verməməlidir, çünki bitkoin son onilliyin ən gəlirli aktividir. “Qısamüddətli perspektivdə kriptovalyuta riskli aktiv kimi görünür, amma son 10 ildə bitkoin ən yüksək gəlirlilik göstərən aktiv olub”, — deyə o vurğulayıb.
1 dekabrda bitkoin ən ciddi gündəlik düşüşlərindən birini yaşadı və dəyərinin 6%-ni itirdi. Satış dalğasına 1 milyard dollarlıq mövqelərini bağlayan investorlar səbəb olub. Bitkoinin qiyməti 84 min dollardan aşağı düşsə də, sonradan yenidən 90 min dollar səviyyəsinə qayıdıb.
Kütləvi satış noyabr ayında son dörd ilin ən böyük aylıq ucuzlaşmasından sonra baş verib — həmin ay kriptovalyuta 18 min dollar ucuzlaşıb. Buna qədər bitkoin tarixi maksimuma — 126 min dollardan yuxarı səviyyəyə çatmışdı. Oktyabr ayından bəri kriptovalyuta təxminən 30% dəyər itirib.
