“Coca-Cola”nın baş direktoru dəyişir — Ceyms Kuinsi doqquz il sonra vəzifəsindən gedir. Şirkətin mətbuat xidmətinin məlumatına görə, 2026-cı ilin mart ayının sonunda onu şirkətin əməliyyat direktoru Enrike Braun əvəz edəcək.
Kuinsi şirkətdə 1996-cı ildən çalışır. O, 2017-ci ildə “Coca-Cola”nın baş direktoru, 2019-cu ildə isə Direktorlar Şurasının sədri olub. Vəzifədən getdikdən sonra o, şirkətdə icraçı sədr postuna keçəcək.
“Bloomberg” qeyd edir ki, Kuinsinin rəhbərliyi dövründə “Coca-Cola”nın səhm dəyəri 60%-dən çox artıb. O həmçinin şirkətin məhsul xəttini genişləndirib — məsələn, çeşidə qəhvə və idman içkiləri əlavə olunub.
“Coca-Cola”nın mətbuat xidmətinin məlumatında bildirilir ki, Kuinsi şirkətin strategiyasını və əməliyyat modelini yeniləyib və onu “daha çevik” etmək üçün mühüm dəyişikliklər edib.
