“Goldman Sachs”ın bir gün əvvəl dərc olunmuş analitik qeydinə görə, təklifin artması bazarda profisit yaradacağı üçün bu il neft qiymətləri enəcək. Bununla yanaşı, Rusiya, Venesuela və İranla bağlı geosiyasi risklər dəyişkənliyi artırmaqda davam edəcək.
İnvestisiya bankı 2026-cı il üçün Brent/WTI markalı neftin orta qiymət proqnozunu müvafiq olaraq 56/52 dollar səviyyəsində saxlayıb və OECD ölkələrində ehtiyatların yığılması fonunda son rübdə Brent/WTI qiymətlərinin minimum olaraq 54/50 dollara düşəcəyini gözləyir.
“Qlobal neft ehtiyatlarının artması və 2026-cı ildə sutkada 2,3 milyon barel həcmində profisit proqnozumuz göstərir ki, ciddi tədarük pozuntuları və ya OPEC ölkələri tərəfindən hasilatın azaldılması baş verməzsə, bazarın balansının bərpası üçün 2026-cı ildə neft qiymətlərinin aşağı düşməsi ehtimalı yüksəkdir. Bu, OPEC-ə daxil olmayan ölkələrdə təklif artımını yavaşlatmalı və davamlı tələbin artımını dəstəkləməlidir”, — “Goldman Sachs” bildirib.
Yanvarın 12-də günorta saatlarında Brent markalı neftin fyuçersləri barel üçün təxminən 62,9 dollar səviyyəsində ticarət olunub, ABŞ-nin West Texas Intermediate (WTI) markalı nefti isə 58,6 dollar səviyyəsində qalıb. Keçən il hər iki etalon göstərici 2020-ci ildən bəri ən zəif illik nəticəni göstərərək təxminən 20% ucuzlaşıb.
Bankın analitikləri qeyd ediblər ki, ABŞ siyasətçilərinin dayanıqlı enerji təminatına və nisbətən aşağı neft qiymətlərinə fokuslanması aralıq seçkilər ərəfəsində qiymət artımını məhdudlaşdıracaq.
“Goldman Sachs” analitikləri proqnoz edirlər ki, 2027-ci ildə qiymətlər tədricən bərpa olunmağa başlayacaq və bazar yenidən defisitlə üzləşəcək. Buna səbəb OPEC-ə daxil olmayan ölkələrdə təklif artım tempinin zəifləməsi və tələbin davamlı şəkildə artması olacaq.
İnvestisiya bankı 2027-ci ildə Brent/WTI markalı neftin orta qiymətinin 58/54 dollar olacağını gözləyir ki, bu da əvvəlki qiymətləndirmədən 5 dollar aşağıdır.
“Goldman Sachs” hesab edir ki, onilliyin sonuna doğru, uzunmüddətli investisiyaların bir neçə il aşağı səviyyədə qalmasından sonra 2040-cı ilədək tələbin artması fonunda neft qiymətləri əhəmiyyətli dərəcədə bərpa olunacaq. Bankın proqnozuna görə, 2030–2035-ci illərdə Brent və WTI markalı neftin orta qiymətləri 75/71 dollar təşkil edəcək ki, bu da əvvəlki qiymətləndirmədən 5 dollar aşağıdır.
“Goldman Sachs”ın fikrincə, OPEC-ə daxil olmayan ölkələrdən təklifin daha da artması ehtimalı nəzərə alınmaqla qiymət proqnozları üçün risklər orta dərəcədə aşağı yönlüdür. Analitiklər əlavə ediblər ki, geosiyasi risklərə və spekulyativ mövqelərin aşağı səviyyəsinə baxmayaraq, OPEC tərəfindən hasilatın azaldılmasını gözləmirlər.
