Yaddaş çipləri və məlumatların saxlanması sistemləri istehsal edən şirkətlərin – Sandisk, Western Digital, Micron Technology və Seagate Technology – səhmləri 2024-cü ilin sonundan bəri S&P 500 indeksinin tərkibində gəlirlilik üzrə liderə çevrilib. Buna baxmayaraq, Uoll-strit hazırkı qiymətləndirmələri həddən artıq hesab etmir: süni intellekt infrastrukturunun geniş miqyasda qurulması data mərkəzlərindən daha sabit və proqnozlaşdırıla bilən tələbat formalaşdırır və əvvəlki dövrlərdə kompüter və smartfon bazarlarından asılı olan yaddaş dövrləri ilə paralellərin əhəmiyyətini azaldır.
Equity Armor Investments-in portfel meneceri Co Tiqay deyir:
“Yaddaşın [tələb və təklif] dövrlərini analiz etmə yanaşmasını yenidən düşünmək lazımdır. Biz elə bir vəziyyətlə üz-üzəyik ki, sektorda qiymətlərin və mənfəətin minimum səviyyəsi əvvəlki dövrlərlə müqayisədə xeyli yuxarı qalxıb. Bu isə o deməkdir ki, səhmlərin qiymətləri və onların qiymətləndirilməsi daha dayanıqlı qala bilər. Nəhəng maliyyə resurslarına malik böyük qlobal şirkətlər yaddaşa görə bir-biri ilə hələ uzun müddət rəqabət aparacaqlar.”
Mövcud şəraitin ən azı 2026-cı ilə qədər qorunacağı, bunun da sektorun artımını sürətləndirəcəyi və yaddaş qiymətlərini yüksəldəcəyi gözlənilir: son aylarda DRAM çiplərinin spot qiymətləri indeksi nəzərəçarpacaq dərəcədə artıb (qrafikə baxın). DRAM – süni intellekt serverləri və data mərkəzlərinin işi üçün kritik əhəmiyyət daşıyan operativ yaddaşdır.
Niyə bu dəfə hər şey fərqlidir?
Tarixən yaddaş sektoru texnologiya sənayesinin ən dövri sahələrindən biri sayılırdı: kompüter və smartfon bazarlarından gələn tələbin artıb-azalması mütəmadi olaraq artıq təklifə və qiymətlərin enməsinə gətirirdi, bu da sektorda multiplikatorları məhdudlaşdırırdı. Süni intellekt isə bu modeli dəyişir.
Ən böyük texnoloji şirkətlərin data mərkəzlərinə və hesablayıcı infrastrukturuna milyardlarla dollarlıq investisiyaları yaddaşa və saxlama sistemlərinə ən azı yaxın bir neçə il üçün daha sabit, öngörülebilir tələbat yaradır, deyə Bloomberg qeyd edir.
Bu nə üçün vacibdir?
Hətta süni intellekt ətrafındakı köpük partlasa və süni intellekt üçün yaddaş tələbi azalsa belə, qiymətlərin əvvəlki eniş dövrlərində müşahidə olunan səviyyələrə qayıtması az ehtimal olunur. Analitiklər sektorun fundamental göstəricilərinə münasibətdə daha optimist olmağa başlayıblar: Bloomberg məlumatına görə, Sandisk üzrə 2026-cı il mənfəət konsensus proqnozu son üç ayda 172 faiz artıb, gəlir gözləntiləri isə 21 faizdən çox yüksəlib. Micron-un maliyyə göstəriciləri üzrə proqnozlar da ciddi şəkildə yuxarıya doğru yenilənib.
Eyni zamanda, bazar bu yaxşılaşmanın əhəmiyyətli hissəsini artıq qiymətlərə daxil edib. Qiymətləndirmələr ümumi texnoloji sektorla müqayisədə hələ də nisbətən ölçülü görünsə də, selektivlik kritik əhəmiyyət daşıyır. Seagate istisna olmaqla, sektorun bütün əsas oyunçuları artıq analitiklərin orta hədəf qiymətlərinin üzərində ticarət olunur.
