“Amazon” bürokratiyanı azaltmaq və artıq vəzifələri ləğv etmək istiqamətində iş aparır. Yeni ixtisarlar təxminən 16 min iş yerini əhatə edəcək. ABŞ-dəkı əməkdaşların əksəriyyətinə şirkət daxilində yeni vəzifə tapmaları üçün 90 gün vaxt veriləcək. Bu müddətdə uyğun vəzifə tapmayan və ya “Amazon”da işləməyə davam etmək istəməyənlərə çıxış müavinəti veriləcək, iş tapmaqda dəstək göstəriləcək (necə olacağı dəqiqləşdirilməyib), həmçinin tibbi sığorta və digər təminatlar təqdim olunacaq.
2025-ci ilin oktyabrında “Reuters” mənbələrə istinadən xəbər vermişdi ki, “Amazon” 30 minədək korporativ əməkdaşı ixtisar etməyi planlaşdırır. Həmin vaxt şirkət artıq 14 min nəfərin ixtisarını təsdiqləmişdi.
“Bloomberg”in qeyd etdiyi kimi, şirkətin rəhbəri Endi Cessi pandemiya dövründə kütləvi işə qəbuldan sonra menecerlərin sayının azaldılmasının vacibliyini dəfələrlə vurğulayıb. O, həmçinin əməkdaşları süni intellekt alətlərindən istifadə etməyi öyrənməyə çağırıb. Bu texnologiyaların inkişafı yaxın bir neçə il ərzində işçi sayının azalmasına səbəb ola bilər.
“Reuters”in məlumatına görə, 30 sentyabr 2025-ci il tarixinə “Amazon”da təxminən 1,57 milyon nəfər çalışıb və onların əksəriyyəti anbarlarda işləyib. Korporativ əməkdaşların ümumi sayı isə təxminən 350 min nəfər olub.
Agentliyin yazdığına görə, 27 yanvar 2026-cı ildə — ixtisarların ictimai elanından bir gün əvvəl — “Amazon”, ehtimal ki, əməkdaşlarına planları barədə məktublar göndərib. Şirkət məktubda bu planları “Project Dawn” adlandırıb.
