ABŞ-də gənclər kapital toplamaq üçün mənzil almaq strategiyasından imtina edərək fond bazarına investisiya etməyə üstünlük verməyə başlayıblar. Aktivliyin artması fond bazarındakı rekord göstəricilər və ticarət texnologiyalarına çıxışın ucuzlaşması ilə üst-üstə düşür.
“The Wall Street Journal” “JPMorgan Chase Institute”nin məlumatlarına istinadən yazır ki, 25–39 yaş arası şəxslər arasında hər il investisiya hesablarına vəsait köçürənlərin payı 2013-cü ildəki 4–5%-dən 2023-cü ildə 14,4%-ə yüksəlib. 26 yaşlılar arasında isə bu göstərici 2015-ci ildəki 8%-lə müqayisədə 2025-ci ilin may ayına qədər 40%-ə çatıb.
Bununla yanaşı, gənclər üçün mənzilin əlçatanlığı kəskin şəkildə azalıb. “Redfin”in məlumatına görə, 18–39 yaş arası alıcıların payı 1999-cu ildə 51% olduğu halda, 2025-ci ildə 44%-ə düşüb.
“The Wall Street Journal” qeyd edir ki, bir çox Z nəsli nümayəndəsi üçün investisiya gələcəyə inam qazanmaq vasitəsinə çevrilib. Tədqiqatçı Zosi Kuperin sözlərinə görə, gənclər sabit və sadə karyera qurmaq imkanına əmin deyillər və iqtisadi mövqelərini müəyyən qədər təmin etmək üçün investisiyalardan istifadə edirlər.
