Hindistanlı milyarder Qautam Adaniyə məxsus “Adani” şirkəti 2035-ci ilə qədər ölkədə bərpa olunan enerji mənbələri əsasında süni intellekt (Sİ) üçün məlumat emalı mərkəzlərinin yaradılmasına 100 milyard dollar investisiya yatırmağı planlaşdırdığını açıqlayıb. Şirkət dünyada ən böyük inteqrasiya olunmuş data mərkəz platformasını qurmağı və Hindistanı qlobal Sİ yarışında liderlər sırasına çıxarmağı hədəflədiyini bildirib.
Layihə Adani ilə data mərkəzi xidmətləri provayderi “EdgeConneX”in birgə müəssisəsi olan “AdaniConnex” platforması əsasında həyata keçiriləcək. Platformanın gücü 2,5 dəfə artırılaraq 2 QVt-dan 5 QVt-a çatdırılacaq. Adani həmçinin “Google” və “Microsoft” ilə strateji tərəfdaşlığını xatırladıb. Hər iki ABŞ şirkəti Hindistanda Sİ sahəsinə çoxmilyardlı investisiya planlarını açıqlayıb. “Google” 2025-ci ilin oktyabrında ölkənin cənubunda data mərkəzi yaratmaq üçün beş il ərzində 15 milyard dollar investisiya yatırmaq niyyətini bəyan edib. “Microsoft” isə 2026–2029-cu illərdə Hindistanda Sİ infrastrukturuna 17,5 milyard dollar sərmayə qoymağı planlaşdırdığını açıqlayıb. “Adani” digər iri Sİ oyunçuları ilə də danışıqlar apardığını bildirib.
Qautam Adani proqnozlaşdırır ki, 2035-ci ilə qədər layihə server istehsalı, energetika infrastrukturu, Hindistanın dövlət bulud platformaları və əlaqəli sahələrə əlavə 150 milyard dollar investisiyanı stimullaşdıracaq. Nəticədə ölkədə 250 milyard dollar dəyərində Sİ infrastrukturu ekosistemi formalaşacaq.
Milyarderin sözlərinə görə, dünya “intellektual inqilab” dövrünə daxil olur və enerji ilə hesablama gücünü birləşdirməyi bacaran ölkələr növbəti onillikdə lider olacaq. O qeyd edib ki, “Adani” Hindistanın texnoloji suverenliyini inkişaf etdirməyi və ölkəni Sİ-nin “yaradıcısı, inkişaf etdiricisi və ixracatçısı”na çevirməyi hədəfləyir. Şirkət təşəbbüsün Hindistanı “yeni intellektual inqilabın qlobal lideri” kimi mövqeləndirməyə yönəldiyini vurğulayıb.
“Adani Group”un flaqman şirkəti olan “Adani Enterprises”in səhmləri Hindistanda ticarət zamanı 3,1% artaraq 2252 rupiyə (24,8 dollar) yüksəlib. “Reuters”in qeyd etdiyi kimi, bu səhmlər Hindistanın “Nifty 50” indeksində ən çox artım göstərənlərdən biri olub.
