Deutsche Bank AG hesab edir ki, Çin yuanı son dövrlərdə möhkəmlənməsinə baxmayaraq, avroya nisbətdə hələ də dəyərindən aşağı qiymətləndirilir və bu, Avropa İttifaqının ticarət kəsirini artırır.
Bankın strateqi Şreyas Qopalın hesabatına görə, alıcılıq qabiliyyəti pariteti və xarici balans kimi bir sıra iqtisadi göstəricilər əsasında yuan hazırda avroya nisbətdə təxminən 15% aşağı qiymətləndirilir. Bir il əvvəl bu göstərici 20% idi.
Qopal bildirib ki, avro/yuan (EUR/CNY) məzənnəsinin ədalətli səviyyəyə yaxınlaşması belə Avropanın Çinlə müqayisədə rəqabət qabiliyyəti problemini tam həll etməyəcək. Bununla belə, analitiklərin fikrincə, yuanın daha da möhkəmlənməsi müəyyən dəstək verə bilər.
Ötən ay yuan avroya qarşı 2025-ci ilin martından bəri ən yüksək səviyyəyə yüksəlib.
İlin əvvəlindən Çin valyutası avroya nisbətdə 6,2% möhkəmlənib. Ötən ay məzənnə 1 avro üçün 7,7074 yuan səviyyəsinə çataraq 2025-ci ilin martından bəri maksimumu yeniləyib. Bununla belə, yuan hələ də 2022-ci ildə qeydə alınmış 6,7260 yuan/avro zirvəsindən təxminən 13% aşağıdır.
Yuanın məzənnəsi Avropa İttifaqı ilə Çin arasında münasibətlərdə gərginlik yaradan məsələlərdən biri olaraq qalır. Avropa rəsmiləri Çinlə ticarət kəsirini azaltmağa çalışırlar.
Almaniya kansleri Fridrix Merts bazar ertəsi yenidən Çinlə valyuta dialoquna çağırış edərək bildirib ki, yuan uzun illərdir təxminən 25% aşağı qiymətləndirilir.
Deutsche Bank həmçinin qeyd edib ki, Almaniyanın rəqabət qabiliyyəti Çinlə müqayisədə xüsusilə zəifləyib. Bankın qiymətləndirməsinə görə, yuanın hipotetik Alman markasına nisbətdə aşağı qiymətləndirilməsi avroya nisbətən daha qabarıq görünür.
“Modellərimiz göstərir ki, yuanın hipotetik alman markasına qarşı aşağı qiymətləndirilməsi avroya nisbətən daha böyükdür. Bu da Almaniyanın rəqabət qabiliyyəti probleminin bütövlükdə avrozonadan daha dərin olduğunu nümayiş etdirir”, – deyə Şreyas Qopal bildirib.
Çin Xalq Bankı isə yuanın dollara qarşı mülayim şəkildə möhkəmlənməsinə imkan verməyə hazır olduğunu açıqlayıb. Tənzimləyici bu yaxınlarda yuanın 2023-cü ilin fevralından bəri ən yüksək gündəlik sabit məzənnəsini müəyyən edib.
