Şirkət 2027-ci ilin martında başa çatacaq maliyyə ili üzrə mənfəətin azalacağını proqnozlaşdırır
Yaxın Şərqdəki qeyri-sabitlik və Çindəki geriləmə fonunda Toyota Motor-un satışları cüzi azalıb. Bloomberg yazır ki, bunun nəticəsində dünyanın ən böyük avtomobil istehsalçısı ardıcıl beşinci ay satışların azalmasını qeydə alıb.
Toyota-nın törəmə şirkəti Daihatsu Motor-un nəticələri də daxil olmaqla, iyun ayında qlobal satışlar ötən ilin eyni dövrü ilə müqayisədə 1,1% azalaraq 926 688 avtomobil təşkil edib. İstehsal isə 2,2% artaraq 984 408 avtomobilə çatıb.
Neftin və xammalın qiymətlərinin kəskin bahalaşması, eləcə də təchizat zəncirlərindəki pozuntular qlobal avtomobil istehsalçılarına təzyiq göstərir. Yapon avtomobil istehsalçılarının üzləşdiyi gərgin vəziyyət onların Yaxın Şərqdən güclü asılılığını göstərir. BYD və digər elektromobil istehsalçılarının yaratdığı sərt rəqabət isə Çində satışların qeyri-sabitliyini daha da artırır.
İyun ayında Toyota və Lexus markalı avtomobillərin satışı ötən ilin eyni dövrü ilə müqayisədə Yaxın Şərqdə 24%, Çində isə 27% azalıb.
Toyota tədarükdəki fasilələr səbəbindən xammal xərclərinin artacağını gözlədiyi üçün 2027-ci ilin martında başa çatacaq maliyyə ili üzrə mənfəətin azalacağını proqnozlaşdırır. Şirkətin 3 trilyon yen, yəni 18,4 milyard dollar səviyyəsində əməliyyat mənfəəti proqnozu analitiklərin gözləntilərindən aşağı olub. Bu göstərici, həmçinin əvvəlki 12 ay üçün 3,8 trilyon yen mənfəət gözləyən analitiklərin proqnozlarını doğrultmayıb.
