Türkiyə səhmləri çərşənbə günü kəskin ucuzlaşıb. Buna aktivlərin idarə edilməsi şirkətlərindən birinin investorların payların geri alınması tələblərini qarşılaya bilməməsi və bunun ölkənin investisiya fondları sektorunda daha geniş likvidlik böhranına çevrilə biləcəyi ilə bağlı narahatlıqlar səbəb olub.
Banker.az bunu “Bloomberg” agentliyinə istinadən xəbər verir.
“Borsa İstanbul 100” indeksi gün ərzində 5,7%-ə qədər geriləyib. Bununla iki günlük eniş 6,9%-ə çataraq 2025-ci ilin martından bəri ən kəskin azalmaya yaxınlaşıb. İndeksə daxil olan səhmlərin yalnız biri ucuzlaşmayıb. Türkiyənin faktorinq şirkəti “Destek Finans Faktoring”in səhmləri 10% düşüb. Daha sonra indeks itkilərin bir hissəsini bərpa edərək İstanbul vaxtı ilə saat 11:55-də 3% aşağı ticarət olunub.
Türkiyənin maliyyə məlumatları platforması “Fintables”ın məlumatına görə, çərşənbə günü ölkənin investisiya fondlarından xalis 55 milyard lirə, yaxud təxminən 1,13 milyard dollar vəsait çıxarılıb.
Türkiyənin portfel idarəetmə şirkəti “Tera Portföy Yönetimi”ndən xalis çıxış təxminən 32 milyard lirə, eyni sahədə fəaliyyət göstərən “Pusula Portföy Yönetimi”ndən isə təxminən 10 milyard lirə olub.
Satış dalğası “Pusula Portföy”ün bəzi investisiya və pul bazarı fondlarının investorların geri alış tələblərini yerinə yetirə bilmədiyini açıqlamasından sonra başlayıb.
Türkiyənin investisiya şirkəti “Tera Yatırım Menkul Değerler” bildirib ki, “Pusula”nın portfel və qiymətli kağızların idarə edilməsi biznesinin alınması üzrə razılaşma hələ tamamlanmayıb və şirkət geri alış proseslərinə görə məsuliyyət daşımır.
Türkiyənin konsaltinq şirkəti “BVeri Consulting”in təsisçisi və iqtisadçısı Banu Kıvçı Tokalının sözlərinə görə, fondların təminatlarının etibarlılığı və likvidliyi ilə bağlı artan narahatlıq digər fond və şirkətlərin də problemlərlə üzləşə biləcəyi riskini yüksəldib. O bildirib ki, ayrı-ayrı sektorlarda etimad itkisi bazardakı satış dalğasının güclənməsində mühüm rol oynayıb.
