ABŞ Nikaraquanın həmsədrlərinin iki oğluna, eləcə də beş məmur və yeddi şirkətə qarşı sanksiyalar tətbiq edib. Onlar ABŞ mülkiyyətinin milliləşdirilməsində, qızıl ilə qanunsuz əməliyyatlarda və çirkli pulların yuyulmasında iştiraka görə ittiham olunurlar. Bu barədə Dövlət Departamentinin bəyanatında bildirilir.
“ABŞ [Daniel] Orteqa və [Rosario] Murilyonun iki oğluna, daha beş şəxsə və yeddi şirkətə qarşı sanksiyalar tətbiq edir. Onlar Nikaraquanın qızıl hasilatı sektoruna korrupsiya yolu ilə nəzarətin qurulmasına, ABŞ vətəndaşlarının əmlakının müsadirəsinə və ailəvi hakimiyyətin formalaşmasına şərait yaradıblar”, — deyə bəyanatda qeyd olunub.
ABŞ hakimiyyətinin fikrincə, sanksiyalara məruz qalan şəxslər saxta şirkətlər və vasitəçilərdən ibarət mürəkkəb sxem quraraq qızıl və digər aktivlərin satışından əldə olunan vəsaitlərin yuyulmasına və şəxsi zənginləşməyə yönəldilməsinə imkan yaradıblar. Dövlət Departamenti vurğulayıb ki, ABŞ Nikaraquanın mövcud rəhbərliyinə qarşı sanksiya təzyiqini davam etdirəcək.
Fevralın 27-də ABŞ Nikaraquanın əsas dövlət qurumlarına rəhbərlik edən beş yüksək vəzifəli şəxsə qarşı fərdi sanksiyalar tətbiq etmişdi. Söhbət hərbi kəşfiyyat rəhbərindən, TELCOR telekommunikasiya tənzimləyicisinin başçısından, əmək nazirindən və maliyyə nəzarəti qurumunun iki rəhbərindən gedir.
