ABŞ Senatı Rusiyaya qarşı yeni məhdudiyyətləri və İrana qarşı mövcud sanksiyaların 2031-ci ilə qədər uzadılmasını nəzərdə tutan ikipartiyalı qanun layihəsini razılaşdırıb.
Qanun layihəsi ABŞ Prezidenti Donald Trampa Rusiya neftinin və təbii qazının ən böyük alıcılarına, eləcə də Rusiyaya enerji sanksiyalarından yan keçməyə kömək edən ölkələrə qarşı əlavə rüsumlar tətbiq etmək səlahiyyəti verir.
Sənədin mətninə görə, Tramp ABŞ-yə idxal olunan Rusiya mallarına 500 %-dək, həmçinin Rusiya neft və qazının ən böyük beş alıcısına və sanksiyalardan yan keçməyə kömək edən ölkələrə qarşı əlavə 100 %-lik rüsumlar tətbiq edə biləcək.
Qanun layihəsi həmçinin 1996-cı il İrana qarşı sanksiyalar haqqında qanunun müddətini 2031-ci ilə qədər uzadır. Sənəd İranla biznes aparan qeyri-ABŞ şirkətlərinə qarşı ikinci dərəcəli iqtisadi sanksiyaları nəzərdə tutur. Qanunun qüvvədə olma müddəti bu il başa çatırdı.
Tramp daha əvvəl mərhum senator Lindsi Qremin fəal şəkildə təşviq etdiyi qanun layihəsini dəstəkləmişdi. Sənəd üzrə prosedur səsverməsi iyulun 28-nə planlaşdırılıb.
“Bloomberg” qeyd edib ki, bəzi demokratlar qanun layihəsinə qarşı çıxırlar. Onlar Trampın səlahiyyətlərindən geniş tariflər tətbiq etmək üçün istifadə edə biləcəyindən ehtiyat edirlər.
ABŞ Nümayəndələr Palatası avqust tətilinə çıxıb, buna görə də sənəd sentyabrdan tez qüvvəyə minə bilməyəcək.
