Avropa İttifaqı Komissiyası İttifaqın sərhədləri daxilində avtomobil sürücüləri üçün sürücülük vəsiqələrinin rəqəmsallaşdırılması ilə bağlı təklif hazırlayıb.
Nəqliyyatdan məsul Adina Valean Aİ Komissiyası üzvlərinin yol təhlükəsizliyi ilə bağlı iclasından sonra hazırlanan təklifləri açıqlayıb.
Təklifə əsasən, Aİ üzvləri arasında sürücülük vəsiqələrinin qarşılıqlı tanınmasını asanlaşdırmaq üçün rəqəmsal sistem tətbiq ediləcək. Rəqəmsal lisenziyalar mövcud olduqda, onlara mobil telefondan və ya digər rəqəmsal cihazdan daxil olmaq mümkün olacaq. Bu, bütün Aİ-də etibarlı olacaq. Aİ daxilində sürücülük vəsiqələrinin rəqəmsallaşdırılması üçün tələblər daha sonra müəyyən ediləcək.
Rəqəmsal sürücülük vəsiqəsinə keçid üçün 4 il müddət nəzərdə tutulub. Aİ Komissiyası rəqəmsal keçid qaydalarını təklifin qəbulundan sonra 18 ay ərzində qəbul etməyi hədəfləyir.
Aİ Komissiyasının təklifinin qanuna çevrilməsi üçün o, üzv dövlətlər və Avropa Parlamenti tərəfindən də qəbul edilməlidir.
