“Azərbaycan Sənaye Korporasiyası” ASC-yə məxsus “Azəralüminium” MMC 2022-ci ili 27 milyon 715 min manat xalis mənfəətlə başa vurub. 2021-ci ildə MMC-nin mənfəəti 30 milyon 76 min manat olub ki, bu da illik müqayisədə 8% azalma deməkdir.
Banker.az bu barədə şirkətin maliyyə hesabatına istinadən xəbər verir.
“Azəralüminium”un ötən il gəlirləri 286 milyon 720 min manat (əvvəlki ilə nisbətən 22.3% çox), satışın maya dəyəri isə 232 milyon 238 min manat (36% çox) təşkil edir.
Xatırladaq ki, “Azəralüminium” MMC Azərbaycan Sənaye Korporasiyasının strukturundadır və ölkənin əlvan metallurgiya sənayesinin aparıcı şirkəti olaraq, gil-torpaqdan (aluminium oksidi), ilkin alüminium və aluminium yarımfabrikat (alüminium külçə, tökmə rulonları, soyuq yayma rulonları, lövhələri və zolaqları, həmçinin boyanmış rolunlar, pəncərə içlikləri) məhsullarının istehsalını həyata keçirir.
