Azərbaycan bank sistemində təmərküzləşmə (bir yerə toplanmaq, yığılmaq, cəmləşmək) səviyyəsində artım tendensiyası müşahidə edilir.
Banker.az bildirir ki, bu barədə Azərbaycan Mərkəzi Bankının 2022-ci il üzrə Maliyyə sabitliyi hesabatı qeyd edilir.
Beynəlxalq təcrübədə geniş istifadə olunan HHI* indeksi son illər aktiv və depozitlər üzrə təmərküzləşmədə artım, kreditlər üzrə isə azalma müşahidə edildiyini göstərir.
Bununla belə, 2022-ci ilin sonu üzrə bank sektorunda təmərküzləşmə aktivlər və depozitlər üzrə orta (müvafiq olaraq 1584 və 1819) və kredit portfeli üzrə isə aşağı (982) səviyyədə olub.
Ən böyük 3 bankın sistem üzrə bazar payının dinamikası son illərdə təmərküzləşmənin artdığını göstərir.
“Belə ki, 2019-cu il ilə müqayisədə ən böyük 3 bankın aktivlər üzrə bazar payı 9 f.b. artaraq 65%, depozit portfeli üzrə bazar payı 13 f.b. artaraq 70%, kredit portfeli üzrə bazar payı isə 8 f.b. artaraq 48% olmuşdur. Son 3 ildə bank sektoru üzrə təmərküzləşmənin artımı diqqətdə saxlanılır”- deyə, Azərbaycan Mərkəzi Bankının hesabatında deyilir.
*HHİ indeksi beynəlxalq təcrübədə bazarlarda rəqabətliliyin səviyyəsi və təmərküzləşməni qiymətləndirmək üçün istifadə olunur. Amerika Birləşmiş Ştatların Ədliyyə departamentinin təcrübəsinə əsasən bu indeks əsasında bazarlar 3 hissəyə ayrılır: aşağı səviyyədə təmərküzləşmiş bazarlar (HHİ<1500), orta səviyyədə təmərküzləşmiş bazarlar (1500<HHİ<2500), yüksək səviyyədə təmərküzləşmiş bazarlar (HHİ>2500). HHİin dəyəri 0-10000 arasında dəyişir.
