“Bu gün ənənəvi elektrik stansiyalarına yatırılan investisiyaları tamamilə alternativ və bərpaolunan enerji mənbələrinə yönəltsək həmin effekti ala bilmərik. Üstəlik, bu, ölkədə elektrik enerjisinin qiymətinin artmasına gətirib-çıxarar”.
Bunu açıqlamasında Energetika nazirinin müavini Elnur Soltanov deyib. Bu barədə Report agentliyi yazır.
“Ən mühafizəkar hesablamalara görə, enerji istehsalı potensialımız pik vaxtlarda belə tələbatımızdan azı 10% çoxdur. Bu da çox yaxşı göstəricidir. Yəni, Azərbaycan özünü enerji təhlükəsizliyi baxımından “güvənli sular”da hiss edə bilər. Çox etibarlı bir nöqtədəyik. Artıq liberallaşma üçün əla zəmin yaranıb. Təhlükəsizlik məsələsi həll olunduğuna görə, bu təhlükəsiz mühitdən daha çox səmərə əldə etməyə fokuslanmalıyıq.
Alternativ və bərpa olunan enerji istehsalına gəlincə isə burada problem ondan ibarətdir ki, onun qiyməti hələ də ənənəvi enerjidən yüksəkdir. O cümlədən də Azərbaycanda. Məsələn, hazırda Avropa ölkələrində ənənəvi yolla istehsal edilən 1 kVt/saat elektrik enerjisinin maya dəyəri orta hesabla 35 qəpik, Azərbaycanda isə 8 qəpikdir. Ölkəmizdə alternativ enerjinin maya dəyəri isə 10-12 qəpikdir. Bu fərqlə enerjini əhaliyə transfer etsək sosial çətinliklər ortaya çıxa bilər. Əhalinin artıq pul ödəməməsi üçün dövlət bu sahəyə subsidiyalar verməlidir”, – deyə o, qeyd edib.
Nazir müavini ayrılan subsidiyaların alternativ enerjiyə yönəldilməsi imkanlarına da münasibət bildirib: “Deyilə bilər ki, subsidiyanı ənənəvi sektora yox, məhz bərpaolunan sektora yönləndirək. Amma mənə elə gəlir, bu sahədə çox ciddi addımlar atılmaqdadır. Bilirsiniz ki, Nazirliyimiz artıq 10-a yaxın təşkilatla anlaşma memorandumu imzalayıb və danışıqlar gedir. Qiymətləri də kifayət qədər optimal səviyyəyə endirməyi bacarmışıq. Bu sahədə də işlər gedir. Mən deməzdim ki, bizim ənənəvi enerji sahəsində atdığımız addımlar bərpa olunan enerji sahəsində atdığımız addımları əngəlləyir. İşlər bütün sürəti ilə davam edir. Müəyyən məsələlər var, onların da başında qiymət məsələsi dayanır. Yeni mənbədən elektrik enerjisini almaq asandır, amma əsas məsələ həmin fərqi kim ödəyəcək. Əlbəttə ki, dövlətə də yeni subsidiyaların yüklənməsi istənilməzdir. Həmçinin əhali üçün də məqbul bir hal olmaz. Biz Azərbaycana töhfə verərkən qiymət artımı onun tərkib hissəsi olmamalıdır. Yəni yaranan məsələlər bundan ibarətdir”.
Qeyd edək ki, hazırda istehsalçılara alternativ enerji üzrə satış tarifi kv/saat üçün 5-6 qəpik arası, əhali üçün isə 7 qəpikdən hesablanır.
