Bu ilin yanvar-avqust aylarında Azərbaycanda fəaliyyət göstərən 22 sığorta şirkətinin xətti ilə 368,915 mln. manat sığorta haqqı toplanılıb.
Maliyyə Bazarlarına Nəzarət Palatasına istinadən, bu, ötən ilin eyni dövrü ilə müqayisədə 3,6% çoxdur.
Xatırladaq ki, Azərbaycanın sığorta bazarında sonuncu dəfə artım bu ilin yanvar-aprel aylarının yekununda qeydə alınıb. 4 ay ərzində yerli sığortaçıların daxilolmaları 194,172 mln. manat təşkil edib ki, bu da 1 il əvvələ nisbətən 0,75% çox olub. Yanvar-may, yanvar-iyun və yanvar-iyul aylarının yekununda isə sığorta bazarı müvafiq olaraq 0,8%, 3,2% və 0,8% azalma nümayiş etdirib. Başqa sözlə, 3 aylıq fasilədən sonra bazarda yenidən artım başlayıb.
Təhlil olunan 8 ay ərzində sığorta şirkətlərinin həyata keçirdiyi ödənişlər isə 22,15% artaraq 167,061 mln. manat təşkil edib.
Hesabat dövründə sığorta bazarında toplanmış hər 100 manat sığorta haqqının 45,3 manatı ödəniş edilib. 2016-cı ilin müvafiq dövründə bu göstərici 38,4 manat olub.
Sığorta daxilolmalarının 68,6%-i və yaxud 252,978 mln. manatı könüllü sığorta növlərinin, 31,4%-i və yaxud 115,937 mln. manatı isə icbari sığorta növlərinin payına düşüb. Son 1 ildə könüllü sığorta bazarı 11,7% böyüyüb, icbari sığorta bazarı isə 10,5% kiçilib.
Sığorta ödənişlərinin isə 78,3%-i və yaxud 130,746 mln. manatı könüllü sığorta növlərinin, 21,7%-i və yaxud 36,314 mln. manatı isə icbari sığorta növlərinin payına düşüb. Ötən ilin yanvar-avqust aylarına nisbətən (illik müqayisədə) könüllü sığorta növləri üzrə ödənişlər 30,5% artıb, icbari sığorta növləri üzrə ödənişlər isə 0,7% azalıb.
Sığorta haqlarında həyat sığortasının payı 137,316 mln. manat və yaxud ümumi yığımların 37,2%-i qədər, qeyri-həyat sığortasının payı isə 231,6 mln. manat və yaxud ümumi yığımların 62,8%-i qədər olub. Son 1 ildə həyat sığortası bazarı 30,3% böyüyüb, qeyri-həyat sığortası bazarı isə 7,65% kiçilib.
Sığorta ödənişlərinin isə 47,3%-i və yaxud 79,05 mln. manatı həyat sığortasının, 52,7%-i və yaxud 88,011 mln. manatı isə qeyri-həyat sığortasının payına düşüb. Ötən ilin ilk 8 ayına nisbətən (illik müqayisədə) həyat sığortası üzrə ödənişlər 63,1% artıb, qeyri-həyat sığortası üzrə ödənişlər isə 0,3% azalıb.
