Səudiyyə Ərəbistanı Qırmızı dənizə uzanan əsas neft kəmərinin fəaliyyətini yaxın günlərdə bərpa etməsə, ixrac üçün nəzərdə tutulan neft ehtiyatları tükənə bilər. Bu isə qlobal neft təklifinin 4%-ə qədər azalmasına səbəb ola bilər. Bunu Səudiyyə neftinin alıcıları və treyderlər bildiriblər.
Banker.az xəbər verir ki, Brent markalı xam neftin bir bareli 109 dollara qədər bahalaşdıqdan sonra sonradan 107 dollar-barelin üzərində qərarlaşıb.
Səudiyyə neft axınlarının daha da azalması qlobal yanacaq qiymətlərini rekord səviyyəyə çatdıran və inflyasiyanı gücləndirən təklif böhranını dərinləşdirə bilər.
Cümə günü pilotsuz uçuş aparatlarının hücumundan sonra Səudiyyə Ərəbistanı şərq-qərb neft kəmərini bağlayıb. Ər-Riyad zərərin miqyası və kəmərin nə qədər müddət işləməyəcəyi barədə ətraflı məlumat açıqlamayıb. “Reuters”ə danışan mənbələrdən biri təmirin 5–6 həftə çəkə biləcəyini, digəri isə kəmərin daha tez və qismən fəaliyyətə başlaya biləcəyini deyib.
Son altı ayda bu kəmər Hörmüz boğazının müharibə səbəbindən bağlanmasının Səudiyyə ixracına təsirini məhdudlaşdırıb. Krallıq gündə təxminən 4 milyon barel nefti Yanbu limanına yönəldirdi.
Mənbələrə görə, Yanbudakı ehtiyatlar ixracı cəmi 5–7 gün davam etdirməyə kifayət edir. Yanbunun saxlama gücü təxminən 35 milyon bareldir.
Beynəlxalq Enerji Agentliyinin məlumatına görə, Səudiyyənin neft təklifi avqustda 30 ildən çox müddətin minimumuna düşüb. Ölkə OPEC-ə hasilatın fevraldakı 10,9 milyon bareldən avqustda 6,2 milyon barelə gerilədiyini bildirib.
