Avropa diplomatiyasının rəhbəri Josep Borrell bildirib ki, Türkiyə hakimiyyəti sanksiyalarla qadağan olunmuş Aİ mallarının Türkiyə üzərindən Rusiyaya təkrar ixracının aparıldığını göstərən məlumatlar verib.
Strasburqda keçirilən plenar iclasda Avropa Parlamentinin deputatlarının suallarını cavablandıran Borrell bu barədə Türkiyənin xarici işlər naziri Mövlud Çavuşoğlu ilə danışdığını deyib.
“O, mənə Avropa İttifaqından Türkiyəyə idxal axını və Türkiyədən Rusiya Federasiyasına ixraca dair məlumatlar verdi”, – deyə Borrell Avropa Parlamentinin üzvlərinə deyib.
Aİ diplomatiyasının rəhbərinin sözlərinə görə, türkiyəli nazirin təqdim etdiyi məlumatlar ümumilikdə Türkiyədən Rusiyaya ixracın artdığını təsdiqləyir.
“Eyni zamanda, Aİ-dən Türkiyəyə idxalda artım qeydə alınmayıb. Buna görə də Avropa mallarının Türkiyə vasitəsilə Aİ ölkələrindən Rusiyaya təkrar ixracı ilə bağlı tezislər öz təsdiqini tapmayıb”, – deyə o, yekunlaşdırıb.
