2023-cü ildə ikinci hərracdır ki, Azərbaycanın 1 illik qısamüddətli, diskontlu istiqrazlarının dövlət istiqrazlarının gəlirliliyi düşür.
Banker.az xəbər verir ki, 7 fevral 2023-cü il tarixində Bakı Fond Birjasında Azərbaycan Respublikasının Maliyyə Nazirliyinin AZ0101030028 ISIN-li, 50 milyon manat həcmində, 364 gün tədavül müddətli dövlət qısamüddətli, diskontlu istiqrazlarının (DQİ) yerləşdirilməsi üzrə hərrac keçirilib.
Hərrac zamanı 25 investor tərəfindən qiymət intervalı 91.7009 (9.1%) manat və 99.9245 (0.0759%) manat olan 46 sifariş təqdim edilmişdir.
Maliyyə Nazirliyinin qərarına əsasən istiqrazların kəsmə qiyməti 92.8440 (7.75%) manat, orta ölçülmüş qiyməti isə 93.5194 (6.9678%) manat olaraq müəyyən edilmişdir. Qeyd edək ki, ort ölçülmüş gəlirlilik 27 dekabr 2022-ci il tarixdə 8.01%-ə qədər çatsa da, 24 yanvar 2022-ci il tarixdə 7.54%-ə düşüb.
Hərracda gəlirliliyin düşməsi ona işarədir ki, ölkədə investorların dövlət istiqrazlarına marağı yenidən artıb. Artan rəqabətdə isə istiqrazların gəlirliliyi azalmağa başlayır.
Bir xatırlatma da etməliyik ki, 1 fevralda Azərbaycan Mərkəzi Bankının İdarə Heyətinin qərarı ilə uçot dərəcəsi 0.25 faiz bəndi artırılaraq 8.5%-ə, faiz dəhlizinin aşağı həddi 0.5 faiz bəndi artırılaraq 6.75%-ə, faiz dəhlizinin yuxarı həddi isə 0.25 faiz bəndi artırılaraq 9.5%-ə qaldırılmışdır.
Sifarişlərin nominal qiymətlə ümumi məbləği 199,907,400 manat, yerləşdirilmiş həcmi isə 50 milyon manat təşkil edilmişdir.
İstiqrazların ödəmə tarixi 06 fevral 2024-cü ildir.
Hərrac iştirakçıları 8 fevral 2023-cü il tarixinədək istiqrazların alışı üzrə öhdəliklərini icra etməlidirlər.
Qeyd: Hərrac zamanı dövlət istiqrazlarına tələb təklifi üstələyəcəyi və qiymət Emitenti qane edəcəyi halda Emitent tərəfindən təklif edilən istiqrazların həcmi 50 faizədək artırıla bilər.
