Biflyasiya – inflyasiya və deflyasiya proseslərinin eyni vaxtda baş verdikdə yaranmış iqtisadi vəziyyətə deyilir. Bir qayda olaraq, bu, bəzi mal qruplarının qiymətlərinin artması,  digərlərinin isə düşməsi ilə ifadə olunur.  “Biflyasiya” termini maliyyə təhlilçisi Osborne Brown tərəfindən təklif edilmişdir.

Biflyasiya nümunələrinə aiddir: daha çox ehtiyac duyulan malların bahalaşması, lüks malların ucuzlaşması; gündəlik malların bahalaşması, kreditə alınan malların ucuzlaşması;

Bu, onunla izah olunur ki, dövlətin mərkəzi bankının pul emissiyası səbəbindən biflyasiya zamanı dövriyyədəki pul kütləsinin həcmi artır və bu da öz növbəsində zəruri malların qiymətinin artmasına səbəb olur, çünki bu mallara ümumi tələb nisbətən sabitdir (Giffen paradoksunu əks etdirir). Eyni zamanda biflyasiya dövründə işsizliyin artması, əhalinin alıcılıq qabiliyyətinin isə azalması müşahidə olunur. Bununla əlaqədar olaraq ən çox ehtiyac duyulan mallara tələbat artır, lüks mallara isə tələbat azalır və bu da lüks malların ucuzlaşmasına səbəb olur.

Biflyasiya sənayedən asılı olmayaraq istənilən bazarda baş verə bilər. Lakin ən çox bu, iqtisadi böhran və ya daşınmaz əmlak bazarındakı uzunmüddətli tənəzzül,  avtomobil sənayesində və digər pərakəndə ticarət bazarlarında baş verir.