Yaxın Şərqdə gərginliyin artması fonunda neft bazarında qiymətlər kəskin yüksəlib. Yenə də səbəb isə Fars körfəzinə giriş-çıxışın minimum səviyyəyə enməsidir. Xüsusilə Hörmüz boğazı ətrafında vəziyyət qlobal enerji tədarükü üçün əsas risk faktoru kimi diqqət mərkəzindədir.
Banker.az xəbər verir ki, Brent markalı neft fyuçersləri təxminən 5% bahalaşaraq bir barel üçün 95.16 dollara çatıb. Bu artım əsasən regionda nəqliyyat axınının məhdudlaşması ilə bağlı narahatlıqlardan qaynaqlanır.
Bununla belə, məlumatlar göstərir ki, tam blokada mövcud deyil. Analitik şirkətlərin məlumatına əsasən, şənbə günü neft məhsulları, qaz, metal və gübrə daşıyan 20-dən çox gəmi boğazdan keçib. Bu, martın 1-dən bəri ən yüksək göstərici olub və bazarda müəyyən optimizm yaradıb.
Eyni zamanda, regionda münaqişə ilə bağlı atəşkəsin taleyi qeyri-müəyyən olaraq qalır və bu da enerji bazarlarında qeyri-sabitliyi artırır. ABŞ-ın İran gəmisini ələ keçirməsi və Tehranın cavab tədbirləri ilə bağlı açıqlamaları risklərin yenidən artmasına səbəb olub.
Bazar iştirakçıları üçün əsas indikator hazırda Hörmüz boğazından keçən gəmilərin sayıdır. Analitiklər hesab edir ki, bu göstərici neft təchizatı və mümkün çatışmazlıqlar barədə ən vacib siqnal rolunu oynayır və qiymət dinamikasına birbaşa təsir göstərir.
