ABŞ-nin IBM korporasiyasının səhmləri aprelin 23-də Nyu-York Fond Birjasında premarket ticarəti zamanı 7,6% azalaraq minimumda 232,7 dollar səviyyəsinə düşüb. Ticarət məlumatlarına görə, aprelin 22-də əsas sessiyanın yekununda səhmlər 251,86 dollar (-1,5%) olub.
“Bloomberg” yazır ki, IBM-in proqram təminatı bölməsinin satış nəticələri analitiklərin gözləntilərinə uyğun gəlsə də, süni intellektin şirkətin biznesinə potensial mənfi təsiri ilə bağlı investor narahatlıqlarını aradan qaldırmayıb. 2026-cı ilin birinci rübündə proqram təminatından gəlir 11% artaraq 7,05 milyard dollara çatıb. Ümumilikdə şirkətin rüblük gəliri 9% artaraq 15,9 milyard dollar olub ki, bu da analitiklərin gözlədiyi 15,7 milyard dollardan yüksəkdir.
“Bloomberg” qeyd edir ki, IBM son illərdə “Red Hat”, “HashiCorp” və “Confluent” kimi şirkətlərin alınması hesabına proqram təminatı sahəsində yüksək artım tempinə malik biznesə çevrilib. Lakin fevral ayında “Anthropic” köhnə COBOL proqramlaşdırma dilini modernləşdirə bilən alət təqdim etdikdən sonra IBM səhmləri son 25 ilin ən böyük enişini yaşamışdı. Həmin vaxt ABŞ texnologiya sektorunda baş verən kəskin eniş treyderlər tərəfindən “SaaS-apokalipsisi” adlandırılmışdı.
“Jefferies” analitiki Brent Till bildirib ki, investorlar IBM-in proqram təminatı bölməsindən daha güclü nəticələr gözləyirdilər. Onun sözlərinə görə, Uoll-Strit indi müştərilərin süni intellekt alətləri təqdim edən şirkətlərə üstünlük verib-vermədiyini qiymətləndirəcək.
Bununla yanaşı, IBM də digər proqram təminatı təminatçıları kimi məhsullarına süni intellekt inteqrasiyasını genişləndirir və müştərilərə ən yeni texnologiyaları təqdim edə bildiyini vurğulayır. Şirkətin maliyyə direktoru Jim Kavano bildirib ki, generativ süni intellekt hesabına proqram təminatı bölməsinin gəlir artımının əlavə 2 faiz bəndi yüksələcəyi gözlənilir. Onun sözlərinə görə, bu texnologiya ilə bağlı layihələr IBM-in müştərilərə aparıcı süni intellekt modelləri ilə işləməyə imkan verən infrastruktur proqram təminatına tələbatı artırır.
