İran və Rusiya arasında ticarətdə rəqəmsal valyutalardan istifadə məsələsi tərəflər tərəfindən nəzərdən keçirilir, bu barədə Rusiyanın Tehrandakı səfiri Aleksey Dedov bildirib. O qeyd edib ki, “hər hansı konkret razılaşmaların əldə olunması prosesi hələ də iş mərhələsindədir”.
Banker.az bu barədə “Kommersant”a istinadən xəbər verir.
“İxrac-idxal əməliyyatları üçün hesablaşmalarda rəqəmsal valyutalardan və rəqəmsal maliyyə aktivlərindən istifadə məsələləri həm Rusiya, həm də İran tərəfindən nəzərdən keçirilir”, – səfir deyir.
Dövlət Dumasının maliyyə bazarı komitəsinin sədri Anatoli Aksakov parlamentarilərin İrana səfərindən sonra Moskvanın qızıl emalı zavodları tərəfindən dəstəklənən steyblkoinlərin buraxılması məsələsini araşdırması barədə danışıb. Onun fikrincə, bu aktivlər digər ölkələrlə, məsələn, İranla hesablaşmalar üçün istifadə oluna bilər. Yanvarın ortalarında Rusiyanın kriptosənaye və blokçeyn Assosiasiyasının icraçı direktoru Aleksandr Brajnikov “Vedomosti”yə bildirib ki, İran Mərkəzi Bankı Rusiya ilə qarşılıqlı hesablaşmalarda dollar, rubl və İran rialını əvəz edəcək Fars regionu tokeninin yaradılması imkanını müzakirə edir.
