Reuters agentliyinin mənbələrə istinadən verdiyi məlumata görə, PayPal Stripe-ın şirkəti 53 milyard dollara satın almaq təklifini onun real dəyərini tam əks etdirmədiyi və maliyyə ilə tənzimləyici risklər daşıdığı üçün kifayət qədər cəlbedici hesab etmir.
İyulun 15-də məlum olmuşdu ki, Stripe investisiya şirkəti Advent ilə birlikdə PayPal-ı almağı təklif edib. Təklifə əsasən, hər səhm üçün 60,5 dollar, ümumilikdə isə 53 milyard dollar ödənilməsi nəzərdə tutulur. Bu məbləğ PayPal-ın cari bazar kapitallaşmasından yüksək olsa da, şirkət hesab edir ki, təklif onun dəyərini tam əks etdirmir.
PayPal hələlik Stripe-a rəsmi cavab verməyib. Hazırda direktorlar şurası təklifi, o cümlədən alternativ təkliflərin ortaya çıxma ehtimalını qiymətləndirir. Bundan əlavə, maliyyələşdirmənin etibarlılığı, tənzimləyici maneələr və mümkün sövdələşmənin başa çatdırılması üçün tələb olunan vaxt da nəzərdən keçirilir.
2026-cı ilin fevralında Bloomberg Stripe-ın PayPal-ı və ya onun bir hissəsini almaqda ilkin maraq göstərdiyini yazmışdı. Həmin ay Semafor isə PayPal-ın biznesin satışı ilə bağlı danışıqlar aparmadığını, lakin mümkün düşmən satınalma cəhdindən narahat olduğunu bildirmişdi.
1998-ci ildə yaradılan PayPal ödəniş xidmətləri bazarının pionerlərindən biridir. Şirkətin məlumatına görə, 2025-ci ilin sonuna aktiv istehlakçı və kommersiya hesablarının sayı 439 milyon, əməkdaşlarının sayı isə 23,8 min olub.
2026-cı ilin birinci rübündə PayPal-ın gəliri 8,35 milyard dollar, düzəliş edilmiş səhm üzrə mənfəəti isə 1,34 dollar təşkil edib.
