Qazaxıstanın “KazTransOil” şirkəti Almaniyaya neft ixrac edə bilər.
Bu ölkənin şirkəti Almaniyaya “Drujba” kəməri ilə neft tranziti üçün Rusiyanın “Transneft” şirkətinə müraciət etdiyini təsdiqləyib.
Bildirilib ki, “KazTransOil” 2023-cü ildə 1,2 milyon ton Qazaxıstan neftinin “Transneft”in magistral kəmərlər sistemi ilə Almaniyaya nəqli üçün müraciət göndərib.
Xatırladaq ki, bir müddət əvvəl “KazMunayQaz”ın İdarə Heyətinin sədri Maqzum Mirzaqaliyev Almaniyanın İqtisadiyyat və İqlimin Mühafizəsi Nazirliyinin dövlət katibi Mixael Kelnerlə danışıqlardan sonra bildirmişdi ki, şirkət 2023-cü ilin yanvarında Almaniyaya neftin sınaq partiyasının göndərilməsi imkanını nəzərdən keçirir.
