“Samsung Electronics” 2026-cı ilin birinci rübündə əməliyyat mənfəətini ötən ilin eyni dövrü ilə müqayisədə 48 dəfə artıraraq 53,7 trilyon vona (36 milyard dollar) çatdırıb. Qrupun xalis mənfəəti isə 47,1 trilyon vona yüksəlib, bu barədə “Bloomberg” məlumat yayıb.
Bu nəticə süni intellekt (Sİ) sahəsində yüksək gəlirlilik və müştərilərin genişmiqyaslı xərcləri hesabına əldə olunub. “Meta Platforms” və “Alphabet Inc.” isə Sİ infrastrukturu üçün daha böyük investisiyalar planlaşdırır. Bu isə investorları belə qənaətə gətirir ki, Sİ inkişafında əsas məhdudiyyətlərdən biri olan yaddaş artıq bazar dövrlərinin təsirindən daha az asılıdır və sabit artım təmin edə bilər.
Analitiklər hesab edir ki, təklifin məhdud qalması fonunda müqavilə qiymətlərinin sürətlə artması “Samsung”un çip bölməsinin rekord mənfəətini növbəti rüblərdə də artıracaq. Onlar həmçinin qeyd edir ki, Koreyadan yarımkeçirici ixracı aprelin ilk 20 günündə 2,8 dəfə artıb.
Keçən həftə isə təxminən 40 min işçi Cənubi Koreyanın Pxentek şəhərində yerləşən əsas çip mərkəzinin qarşısında toplaşaraq tətil elan edib. Sİ sahəsində əldə olunan yüksək gəlirləri nəzərə alan işçilər maaşların artırılmasını tələb edib və may ayında 18 günlük ümumi tətil ilə hədələyiblər.
Analitiklər istehsalın uzunmüddətli dayandırılmasının nəticələri ilə bağlı fərqli fikirdədirlər: bəziləri bunun istehsalın azalmasına səbəb olacağını düşünür, digərləri isə “Samsung”un əməliyyatlarının yüksək səviyyədə avtomatlaşdırıldığını nəzərə alaraq bunun yalnız qısamüddətli qeyri-sabitlik yaradacağını hesab edir.
