12 C
Baku
Friday, March 29, 2024

Şirkətin 55 milyonluq yeyintidə ittiham olunan sabiq rəhbərinin məhkəməsi başlayıb

“Baku Steel Company” şirkətinin sabiq rəhbəri Rasim Məmmədovun cinayət işi ilə bağlı məhkəmə prosesi başlayıb.

Bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən hazırlıq iclasında ilkin dinləmələr keçirilib. Daha sonra Rasim Məmmədovun hüquqlarını məhkəmədə üç vəkilin Elçin Sadıqov, Zibeydə Sadıqova və Pərviz Məmmədovun müdafiə edəcəyi elan olunub.

Prosesdə vəkil Elçin Sadıqov vəsatət qaldıraraq müdafiəyə yeni qoşulduğu üçün cinayət işi materialları ilə tanış olmadığını bildirərək hazırlıq iclasının 2 həftə sonra davam etdirilməsini istəyib. İttiham olunan şəxs vəsatəti müdafiə edərək, özünün də ittiham aktı ilə tanış olmadığını deyib.

Dövlət ittihamçısı Orxan Səmədov vəsatətə etiraz etməyib.

Vəkillərin növbəti vəsatəti isə Rasim Məmmədov barəsində seçilmiş həbs qətimkan tədbirinin ev dustaqlığı ilə əvəz olunması ilə bağlı olub.

Elçin Sadıqov qeyd edib ki, təqsirləndirilən şəxsin biri azyaşlı olmaqla üç övladı var: “Bundan başqa, müvəkkilimin səhhəti ilə bağlı da problemlər mövcuddur”.

Digər vəkillər və təqsirləndirilən şəxs də vəsatəti müdafiə ediblər.

Müdafiəçilər Rasim Sadıqovun şüşə qəfəsdən çıxarılıb zalda oturması, yaxınlarının da iclasda iştirakına şərait yaradılmasını istəyiblər.

Məhkəmə vəkillərin işlə tanış olmaq üçün vaxt istəmələri ilə bağlı vəsatəti təmin edib. İttiham olunan şəxs barəsində seçilmiş həbs qətimkan tədbirinin dəyişdirilməsi ilə bağlı vəsatət isə rədd olunub.

Digər vəsatətlər baxılmamış saxlanılıb.

Hazırlıq iclası sentyabrın 2-də davam etdiriləcək.

Xatırladaq ki, Rasim Məmmədov 2021-ci ilin fevralın 1-də Dövlət Təhlükəsizliyi Xidməti tərəfindən həbs olunub.

Rəsmi məlumatda bildirilib ki, “Baku Steel Company” MMC-nin Müşahidə şurasının sədri Məmmədov Rasim Hikmət oğlunun tutduğu vəzifədən irəli gələn səlahiyyətlərdən sui-istifadə edərək ölkə ərazisində metallurgiya sənayesinin inkişafına, fiziki və hüquqi şəxslərin hüquqlarına, dövlətin qanunla qorunan mənafelərinə mühüm zərər vuran qanunsuz əməllərə yol verməsi ilə bağlı faktlara dair daxil olmuş məlumatlar DTX tərəfindən araşdırılıb.

Başlanılmış cinayət işi üzrə Rasim Məmmədovun müvafiq vəzifədə işlədiyi dövrdə öz səlahiyyətlərindən qulluq mənafelərinə qəsdən zidd olaraq istifadə edib rəsmiləşdirilmiş satış üzrə müəssisəyə mədaxil edilmiş pul vəsaitlərindən 13 milyon 200 min manatı mənimsəmə yolu ilə talamasına, 42 milyon manat dəyərində istehsal olunmuş məhsulu israf etməsinə, bu əməlləri ilə “Baku Steel Company” MMC-nin maliyyə ehtiyatlarına və davamlı fəaliyyətinə mühüm ziyan vurmasına, həmçinin müxtəlif şəxslərdən külli miqdarda pul vəsaitini aldatma və etibardan sui-istifadə etməklə ələ keçirib təkrar dələduzluq əməllərini törətməsinə əsaslı şübhələr müəyyən olunub.

Rasim Məmmədov Azərbaycan Respublikası Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 179.4-cü (xüsusilə külli miqdarda ziyan vurmaqla mənimsəmə və israf etmə), 178.3.2-ci (külli miqdarda ziyan vurmaqla dələduzluq) maddələri ilə təqsirləndirilən şəxs qismində cəlb olunaraq barəsində məhkəmənin qərarı ilə həbs qətimkan tədbiri seçilib.

 

MənbəApa
Son xəbərlər
Digər xəbərlər