Yaddaş çipləri istehsalçısı SK hynix ABŞ-də səhmlərinin yerləşdirilməsinə başladığını açıqlayıb. Reuters agentliyinin tənzimləyici orqanlara təqdim edilmiş sənədlərə istinadən verdiyi məlumata görə, şirkət ümumilikdə təxminən 28 milyard dollar cəlb etməyi planlaşdırır.
SK Hynix investorlara 17,79 milyon Amerika depozitar qəbzi (ADR) təklif edir. Hər on depozitar qəbz bir səhmə uyğun olacaq. Şirkət qiymət diapazonunu daha sonra Seul birjasındakı kotirovkalar əsasında müəyyən edəcək. Yerləşdirmə qiymətinin iyulun 9-da açıqlanacağı, ABŞ-də depozitar qəbzlərlə ticarətin isə iyulun 10-da başlayacağı gözlənilir.
SK Hynix iyunda ABŞ birjasına çıxmaq planlarını açıqlamışdı. Şirkət 45,45 trilyon von (29,4 milyard dollar) cəlb etməyi hədəflədiyini bildirmişdi. Bu məqsədə nail olunacağı təqdirdə, yerləşdirmə tarixdə ən böyük əməliyyatlardan birinə çevriləcək və 2019-cu ildə həyata keçirilmiş Saudi Aramco-nin IPO-su (29,4 milyard dollar), SpaceX-in 2026-cı ilin iyununda keçirdiyi yerləşdirmə (opsionlar nəzərə alınmaqla 85,7 milyard dollar), eləcə də on milyardlarla dollar həcmində gözlənilən Anthropic və OpenAI yerləşdirmələri ilə eyni sırada yer alacaq.
SK Hynix-in səhmləri iyulun 6-da Cənubi Koreyada keçirilən hərraclar zamanı 3,4% ucuzlaşaraq 2,343 milyon vona (1 530 dollar) enib. Reuters-in məlumatına görə, ilin əvvəlindən etibarən şirkətin səhmləri təxminən 273% bahalaşıb.
Son günlər SK Hynix və digər yaddaş çipi istehsalçılarının səhmləri yüksək volatillik nümayiş etdirir. İnvestorlar süni intellekt bumunun nə qədər davam edəcəyindən narahatdırlar.
Albert Yun hesab edir ki, volatilliyə baxmayaraq, SK Hynix səhmlərinə tələbat yüksək olaraq qalacaq.
Interactive Brokers-in baş bazar strateqi Stiv Sosnik isə düşünür ki, SK Hynix-in ABŞ-də listinqi fərdi investorlar və kiçik investisiya şirkətləri üçün faydalı olacaq. Onun sözlərinə görə, bu yerləşdirmə kapital cəlbinə ehtiyacı olan şirkətə sürətlə böyüyən aktivlərə yönəlmiş investor qrupuna birbaşa çıxış imkanı verəcək.
