“Twitter Inc.” artıq mövcud deyil, belə ki, şirkət “X Corp” ilə birləşib. Sövdələşmə ilə bağlı hələlik rəsmi məlumat verilməsə də, aprelin 4-də Kaliforniya Rayon Məhkəməsində şikayəti qəbul edilən amerikalı fəal Laura Loomerin iddiası sayəsində ictimaiyyətə açıq olub.
Banker.az bu barədə TASS-a istinadən xəbər verir.
“Federal Mülki Prosessual Qaydaların 7.1(a)(1) bölməsinə uyğun olaraq, cavabdeh “X Corp.”un vəkili bildirir ki, şirkət “Twitter Inc.” ilə birləşib”, – sənəddə deyilir. Şirkətlərin faktiki birləşməsinin aprelin 4-də baş verdiyi dəqiqləşdirilir. Bundan əlavə, korporasiya “Twitter”in əsas ofisinin əvvəllər qeydiyyatdan keçdiyi Delaver ştatında deyil, Nevada ştatına köçürüldüyünü vurğulayır.
27 oktyabr 2022-ci ildə Mask “Twitter”i almaq üçün 44 milyard dollarlıq müqavilə bağlayıb. Noyabrın 6-da o, “Twitter Blue” abunəliyinin bir hissəsi kimi ödənişli hesab yoxlamasını tətbiq etmək niyyətində olduğunu açıqlayıb. Noyabrın 10-da abunə satışı saxta hesabların sayının artması səbəbindən dayandırılıb, lakin artıq dekabr ayında satışlar bərpa edilib.
