Ukrayna ətrafında artan gərginliyin enerji resurslarının təchizatına təsir göstərməsi ehtimalı yoxdur. Bu barədə “Goldman Sachs” investisiya bankının analitiklərinin “Forbes” tərəfindən nəzərdən keçirdiyi qeyddə deyilir.
Təhlilə əsasən, münaqişənin gərginləşəcəyi təqdirdə Qərbin hazırladığı sanksiyaların Rusiyanın energetika sənayesinə təsir göstərməsi mümkün deyil, çünki Avropa Rusiyadan qaz və neft tədarükündən asılıdır. “Goldman Sachs”a görə, Avropanın qaz idxalının 22%-i və neft idxalının 23%-i (2021-ci ilin sentyabr ayının sonuna olan məlumata görə) Rusiyanın payına düşür. Bundan əlavə, Moskva zərurət yaranarsa, neft tədarükünü Afrika, Latın Amerikası və Asiya kimi digər regionlara yönləndirə biləcək ki, bu da Avropada enerji resurslarının əlçatanlığı ilə bağlı vəziyyəti daha da gərginləşdirəcək.
Onların proqnozuna görə, enerji təchizatı üçün real təhlükə hücumlar nəticəsində Ukrayna ərazisindən keçən qaz kəmərlərinin zədələnməsidir. “Goldman Sachs” analitiklərinin fikrincə, bu kimi hadisələr bir neçə həftə ərzində təchizatı dayandıra və Şərqi Avropadakı Rusiya qaz alıcılarına böyük təsir göstərə bilər.
Ukrayna ətrafındakı vəziyyət, investisiya bankının proqnozuna görə, ötən ilin payızında tikintisi başa çatan, lakin hələ də istifadəyə verilməyən “Şimal axını 2” qaz kəmərinin taleyinə təsir edə bilər. Münaqişənin gərginləşməsi çox güman ki, Rusiya boru kəmərinin sertifikatlaşdırılmasını daha da ləngidə bilər. Belə bir ssenaridə Avropaya qaz tədarükü qeyri-müəyyən müddətə azalacaq ki, bu da regionun enerji bazarındakı vəziyyəti gərginləşdirəcək.
“Goldman Sachs” ekspertləri həmçinin Ukraynadakı vəziyyətin gərginləşdiyi təqdirdə yanacaq qiymətlərinin necə dəyişəcəyinə nəzər yetiriblər. Onların proqnozlarına görə, ən əlverişsiz ssenaridə qazın qiyməti 12 avro, neftin qiyməti isə 2 dollar arta bilər.
Daha əvvəl “JPMorgan” analitikləri qeyd etmişdilər ki, Ukrayna və Rusiya arasında geosiyasi gərginlik 2022-ci ilin birinci rübündə neft qiymətlərinin kəskin artması riskini artırır. Neftin qiymətinin 150 dollara yüksəlməsi dünya ÜDM- artımının 0.9%-ə (gözlənilən 4.1%-ə qarşı) ləngiməsinə və inflyasiyanın iki dəfədən çox artmasına gətirib çıxaracaq.
“Reuters”in proqnozuna görə, Moskva və Kiyev arasında mümkün qarşıdurma eyni anda bir neçə bazara təsir edəcək: investorlar istiqrazlar və ya qızıl kimi ən təhlükəsiz aktivlərə axışacaq, Rusiya və Ukraynadan taxıl tədarükündə fasilələr ərzaq inflyasiyasını sürətləndirəcək, qaz və neft qiymətləri artmağa davam edəcək və bütün inkişaf etməkdə olan iqtisadiyyatlar arasında ən pis nəticələr göstərən ölkələrin milli valyutaları zərbə alacaq.
