Böyük Britaniya hökuməti biznesə dəstək üçün 4.6 milyard funt sterlinq (6.2 milyard dollar) ayıracaq. Bununla səlahiyyətlilər koronavirus pandemiyasının səbəb olduğu tənəzzülün nəticələrini azaltmaq istəyirlər.
banker.az bu barədə xarici KİV-ə istinadən xəbər verir.
Bildirilir ki, pərakəndə satış və istirahət sektorundakı şirkətlərə 9 min funt sterlinq (12 226 dollar) həcmində vəsait ayrılacaq. Bu, dövlətə 4 milyard funt sterlinqə (5.43 milyard dollar) başa gələcək.
“Bu, müəssisələrə önümüzdəki aylarda “sağ çıxmağa” və ən əsası iş yerlərini qorumağa kömək edəcək. İşçilər pandemiya bitəndən sonra işə qayıtmağa hazır olmalıdırlar”, – deyə İngiltərə Maliyyə Nazirliyinin rəhbəri Rişi Sunak söyləyib.
Xatırladaq ki, yanvarın 4-də Böyük Britaniyada rekord sayda yoluxma halı qeydə alınıb – 58 784 nəfər. Ölkənin baş naziri Boris Conson karantin rejiminin yenidən bərpa edildiyini açıqlayıb. Yeni sərt qaydalara görə, insanlara fövqəladə hallar xaricində evdən çıxmaq qadağan edilib.
“JPMorgan” analitikləri 2021-ci ilin ilk üç ayında Böyük Britaniyada istehsalın 2.5% azalacağını proqnozlaşdırırlar. Qeyd edək ki, ilk karantin rejimi İngiltərədə 2020-ci ilin yazında tətbiq edilib, noyabrda isə ölkədə yeni növ koronavirus aşkarlanıb.
Con Hopkins Universitetinin məlumatına görə, pandemiya başlayandan bəri İngiltərədə 2 721 622 yoluxma qeydə alınıb. Ölkə yoluxanların sayına görə dünyada beşindi yerdədir. Ümumilikdə indiyədək koronavirusdan 75 547 nəfər ölüb.
