Ölkənin aparıcı korporativ maliyyə institutu olan “PAŞA Bank” Azərbaycanın iqlim və davamlılıq təşəbbüslərinə dəstək məqsədilə dayanıqlı maliyyələşmə və ekoloji layihələrə investisiyalar istiqamətində fəaliyyətini gücləndirdiyini bəyan edib.
30 sentyabr – 3 oktyabr tarixlərində keçirilən Bakı İqlim Fəaliyyəti Həftəsi 2025 (BCAW2025) çərçivəsində təşkil olunan panel müzakirələrində Bankın İdarə Heyətinin sədr müavini Bəhruz Nağıyev çıxış edərək COP29-un Azərbaycanın maliyyə sektoruna təsirlərini və dayanıqlılıq istiqamətində bankların rolunu vurğulayıb.
Nağıyev çıxışında qeyd edib:
“COP29-dan sonra “PAŞA Bank” olaraq Azərbaycanın yaşıl keçidinə töhfə vermək üçün portfelimizi ekoloji və sosial meyarlara uyğunlaşdırır, dayanıqlı maliyyələşmə layihələrini dəstəkləyir və KOB-ların yaşıl keçidə cəlb olunmasına önəm veririk. İnanırıq ki, real təsir yalnız bütün maliyyə sektoru tərəfindən dayanıqlılıq prioritet kimi qəbul edildikdə mümkün ola bilər.”
“PAŞA Bank” İdarə Heyəti sədrinin müavini Bəhruz Nağıyev əlavə edib ki, COP29 prosesi maliyyə sektorunda güclü dinamika yaradıb və bankların yalnız iqtisadi mənfəət gətirən deyil, həm də ekoloji və sosial baxımdan məsuliyyətli layihələri maliyyələşdirməsi gözlənilir. O, həmçinin yaşıl maliyyə bazarının inkişafı üçün qanunvericilik çərçivəsinin təkmilləşdirilməsinin və beynəlxalq tərəfdaşlıqların gücləndirilməsinin vacibliyini qeyd edib.
BCAW2025 müxtəlif sahələrdə – siyasət, enerji, elm, maliyyə, gənclər sahibkarlığı, təhsil, moda, idman, mədəniyyət və digər istiqamətlərdə iqlim mövzusunda qlobal dialoqa şərait yaradır. Tədbir dünya liderlərini, mütəxəssisləri, sərmayəçiləri, sahibkarları, gəncləri və icmaları bir araya gətirir.
“PAŞA Bank” 2023-cü ildə BMT Qlobal Sazişinə qoşulub. Bankın “2024–2026-cı illər üçün Korporativ Sosial Məsuliyyət (KSM) strategiyası” BMT-nin Dayanıqlı İnkişaf Məqsədlərinə uyğun şəkildə hazırlanıb. Strateji dövr ərzində “iqlim dəyişikliyinə qarşı mübarizə” Bankın əsas fəaliyyət istiqamətlərindən biri kimi müəyyənləşdirilib.
