ABŞ prezidenti Donald Tramp bildirib ki, İrana qarşı hücum Üçüncü Dünya müharibəsinin qarşısını alıb. Onun sözlərinə görə, ABŞ zərbələri olmasaydı, Tehran bir ay ərzində nüvə silahı əldə edəcəkdi və onu İsrailə və Yaxın Şərqin digər ölkələrinə qarşı tətbiq edəcəkdi.
“Əgər onların nüvə potensialını demək olar ki, toz halına gətirməsəydim, həmin zərbələrdən cəmi bir ay sonra onların artıq nüvə silahı olardı. Və onlar bundan istifadə edərdilər — əvvəlcə İsrailə qarşı, sonra isə bütün Yaxın Şərqə qarşı. …Əgər biz bunu etməsəydik, nüvə müharibəsi başlayardı və bu da Üçüncü Dünya müharibəsinə çevrilərdi. Və daha da vacibi — bu, elə bir müharibə olardı ki, ondan sonra sadəcə heç nə qalmazdı”, — deyə cənab Tramp bildirib (çıxış Ağ Evin “YouTube” kanalında yayımlanıb).
Donald Tramp İranda əməliyyatın səbəbi kimi ölkənin sürətlə inkişaf edən raket proqramını göstərib. Onun fikrincə, ballistik raketlərin yaradılması layihələri “sürətlə və kəskin şəkildə genişlənirdi”.
