Çinin valyuta ehtiyatları ikinci rübdə 74,7 milyard dollar artaraq son 12 ilin ən böyük rüblük artımını qeydə alıb.
Banker.az xəbər verir ki, “Bloomberg”in Dövlət Valyuta Administrasiyasının məlumatlarına əsaslanan hesablamasına görə, bu, 2014-cü ilin birinci rübündən bəri ən yüksək göstəricidir.
Artım yuanın daxili bazarda ardıcıl altıncı rübdə möhkəmlənməsi fonunda baş verib. Analitiklər hesab edir ki, Çin hakimiyyəti ölkəyə daxil olan böyük həcmdə xarici valyutanı aktiv şəkildə alaraq yuanın bahalaşmasını məhdudlaşdırıb və məzənnənin daha sabit qalmasına şərait yaradıb.
“Australia & New Zealand Banking Group”un (ANZ) Asiya üzrə araşdırmalar rəhbəri Kun Qonun sözlərinə görə, Çin Xalq Bankı bu addımları atmasaydı, yuanın möhkəmlənməsi ilə bağlı təzyiq daha güclü olardı. Yuan bazar ertəsi 2023-cü ildən bəri ən yüksək səviyyəyə yüksəlib.
Bununla belə, Standard Chartered Bank-ın Böyük Çin üzrə strategiya rəhbəri Bekki Lyu bildirib ki, valyuta ehtiyatlarının artması mərkəzi bankın siyasətində dəyişiklik olduğunu göstərmir. Onun sözlərinə görə, kommersiya bankları korporasiyalardan daxil olan böyük həcmdə dolları sata bilmədikdə, bu vəsaitlərin bir hissəsi mərkəzi banka ötürülür.
Çində hakimiyyətin yuanın tədricən möhkəmlənməsinə imkan verdiyi, lakin bahalaşmanın sürətini nəzarətdə saxladığı qeyd olunur.
