Azərbaycanda cari ilin dekabr ayında dollara tələb artmaqda davam edir. Ötən gün keçirilən hərracda 89.7 milyon dollarlıq sifariş olub. Bütövlükdə, bu ayın geridə qalan günlərində hərraclarda 446.1 milyon dollar satılıb. Bu ötən ay hərraclarda qeydə alınan 234.7 dollarlıq sifariş ilə müqayisədə təxminən 2 dəfə çoxdur.
Banker.az xəbər verir ki, 2023-cü ilin oktyabr ayı ərzində hərraclarda 202.6 milyon dollar məbləğində vəsait satılıb. 2023-cü ilin 11 ayı ərzində isə hərraclarda 2 milyard 539.5 milyon dollarlıq sifariş qeydə alınıb.
| Dekabr 2023 | |
| Tarix | Satış, mln. $ |
| 05 dekabr 2023 | 95.1 |
| 07 dekabr 2023 | 44.8 |
| 12 dekabr 2023 | 69.1 |
| 14 dekabr 2023 | 70.9 |
| 19 dekabr 2023 | 76.5 |
| 21 dekabr 2023 | 89.7 |
Bundan sonra iki dəfə valyuta hərracı keçirilə bilər.
Aylıq müqayisə göstərir ki, dekabr ayında tələb kəskin artıb. Dekabrın ilk 21 günündə noyabr və oktyabr ayları üzrə cəmi məbləğdən daha çox dollar satılıb. Belə ki, son 2 ayda cəmi 437.3 milyon dollar satıldığı halda dekabrın geridə qalan günlərində 446.1 milyon dollar alınıb.
“Dollara tələbin artması daha çox mövsümi faktorlar ilə bağlıdır”- deyə, buna şərh bildirən deputat Vüqar Bayramov bildirib.
“Dekabrda həm biznesin, həm də vətəndaşların xarici valyuta tələbi yüksəlir. Belə ki, dövlət və özəl müəssisələrin və eləcə də bankların xarici borc öhdəlikləri üçün cari maliyyə ilində son ayın olması, idxalın artması, bayramlar ilə bağlı olaraq xarici səfərlərin çoxalması dollara tələbi artırır”- deyə, deputat bildirir.
Dollara tələbin artması kontekstində manatın məzənnəsinin necə dəyişməsinə gəldikdə isə xüsusilə vurğulamaq lazımdır ki, Azərbaycanda hələ ki, üzən məzənnə rejiminə keçirilməyib.
“Praktiki olaraq, manatın məzənnəsi birbaşa Azərbaycan Mərkəzi Bankının qərarlarından asılıdır”.
