Niderlandın “ING Group”u 2025-ci ilin sonunda Türkiyənin milli valyutasını ABŞ dollarına nisbətdə 40 lirəyə düşəcəyini proqnozlaşdırır.
Bu barədə şirkətin açıqladığı proqnozlarda deyilir.
Hesabata əsasən, 2023-cü ilin üçüncü rübündə USD/TRY məzənnəsi 28,50 lirə, dördüncü rübündə isə 30 lirə təşkil edəcəyi gözlənilir.
ING-nin analitikləri lirənin daha da ucuzlaşacağını proqnozlaşdırırlar. Belə ki, 2024-cü ilin birinci rübündə USD/TRY üzrə proqnoz 31,19 lirə, ikinci rübündə – 32,56 lirə, üçüncü rübündə – 34,16 lirə, dördüncü rübündə isə – 36 lirə təşkil edir.
Qeyd edək ki, Almaniyanın “Deutsche Bank” 2023-cü ilin sonu üçün USD/TRY məzənnəsi üzrə proqnozunu 27 lirədən 32 lirəyə yüksəldib. Bank analitikləri 2024-cü ilin sonu üçün proqnozunu 35 lirə olaraq açıqlayıb.
Böyük Britaniyanın HSBC bankı da USD/TRY üzrə proqnozunu 27 lirədən 29 lirəyə yüksəldib. Bank strateqləri inflyasiya gözləntilərinə istinad edərək 2024-cü il üçün məzənnəni 32 lirə səviyyəsində təxmin edirlər.
2022-ci ildə Türkiyədə inflyasiya 64 %, USDTRY məzənnəsi 18,70 lirə təşkil edib. Bu gün türk lirəsinin dollara nisbəti 27,0383 səviyyəsində olub.
