BANKER.AZ/ Noyabrın 28-də hakim YAP (Yeni Azərbaycan Partiyası) Siyasi Şurasının iclası keçirilib. İclasda YAP Siyasi Şurasının qərarı qəbul edilib. Qərara əsasən, partiyanı təmsil edən deputatlara Azərbaycan Respublikası Milli Məclisinin buraxılması ilə bağlı təşəbbüslə çıxış etmək tövsiyə olunub. Yəni artıq qanunverici orqan yola salınır.
Ötən gün artıq YAP-ın sədr müavini olan Əli Əhmədov da maraqlı bir məqama toxunub. O, bildirib ki, Azərbaycanda müasir biliklərə yiyələnmiş, vətənpərvər gənclik formalaşıb: “Vətənpərvər gənclərdən ibarət parlamentin formalaşması diqqətimizdə olacaq”.
Banker.az bununla bağlı araşdırma aparıb. Həmin məqaləni təqdim edirik:
Kimlər namizəd ola bilər?
Azərbaycan Respublikasının yaşı 25-dən aşağı olmayan hər bir vətəndaşı qanunla müəyyən edilmiş qaydada Azərbaycan Respublikası Milli Asambleyasına deputatı seçilə bilər.
İkili vətəndaşlığı olan, başqa dövlətlər qarşısında öhdəliyi olan, icra və ya məhkəmə hakimiyyəti sistemlərində qulluq edən, elmi, pedaqoji və yaradıcılıq fəaliyyəti istisna olmaqla, başqa ödənişli fəaliyyətlə məşğul olan şəxslər, din xadimləri, fəaliyyət qabiliyyətsizliyi məhkəmə tərəfindən təsdiq edilən, ağır cinayətlərə görə məhkum olunmuş şəxslər, məhkəmənin qanuni qüvvəyə minmiş hökmü ilə azadlıqdan məhrumetmə yerlərində cəza çəkən şəxslər Azərbaycan Respublikasının Milli Məclisinə deputat seçilə bilməzlər.
Qeyd edək ki, seçki dairəsi üzrə namizədləri siyasi partiyalar, siyasi partiyaların blokları, həmin seçki dairəsində daimi yaşayan, seçki hüququ olan Azərbaycan Respublikasının vətəndaşları irəli sürə bilərlər.
Namizəd olmaq üçün nə etmək lazımdır?
Namizəd öz təşəbbüsü ilə və ya aktiv seçki hüququ olan seçicilər tərəfindən irəli sürülə bilər, o şərtlə ki, ərazisində namizədin dəstəklənməsi üçün zəruri olan imzaların yığıldığı və namizədin qeydə alınmasının nəzərdə tutulduğu müvafiq seçki komissiyasına bu barədə bildiriş göndərilsin.
Namizəd və ya namizədi irəli sürən seçicilərin təşəbbüs qrupu bu barədə Dairə Seçki Komissiyasına (DSK) yazılı bildiriş verir. Bildirişdə namizədi irəli sürən hər bir təşəbbüsçünün və namizədin soyadı, adı, atasının adı, doğum tarixi, yaşayış yerinin ünvanı, şəxsiyyət vəsiqəsinin və ya onu əvəz edən sənədin seriya və nömrəsi, bundan başqa, irəli sürülən namizədin əsas iş və ya xidmət yeri, tutduğu vəzifə (bu olmadıqda — fəaliyyət növü) göstərilməlidir.
Namizəd eyni zamanda seçkili vəzifəyə seçiləcəyi halda həmin vəzifə ilə uzlaşmayan fəaliyyətə xitam verəcəyinə dair yazılı öhdəliyi olan ərizə də verir.
Namizəd öz ərizəsinə siyasi partiyaya mənsubiyyəti barədə təsdiq olunan sənəd əsasında məlumatları daxil edə bilər.
DSK təqdim edilmiş sənədlərə 5 gün müddətində baxır və namizədə, onun səlahiyyətli nümayəndəsinə namizədliyin bu dairədən irəli sürülməsini təsdiq edən qərar təqdim edir. DSK təqdim olunmuş sənədlərin qəbul edilməsindən imtina edə bilməz.
DSK-nın bu qərarından sonra artıq imza vərəqələri götürülə və imzalar toplna bilər.
Seçici imzalarını necə toplamalı?
Dövlət orqanlarının, bələdiyyə qurumlarının, mülkiyyət formasından asılı olmayaraq hüquqi şəxslərin imza toplanmasında iştirakına yol verilmir. İmza toplanması prosesində seçiciləri imzalamağa məcbur etmək, imza atmağa imkan verməmək və ya buna görə onları hər hansı formada mükafatlandırmaq qadağandır. Həmin qadağana əməl olunmaması müvafiq məhkəmə tərəfindən təsdiqlənərsə, bu, toplanmış imzaların etibarsız sayılması və namizədin qeydiyyatından, qeydə alınmış namizədlərin qeydiyyatından imtina üçün əsas ola bilər.
Seçici imzalarını Azərbaycan Respublikasının 18 yaşına çatmış aktiv seçki hüququ olan vətəndaşı toplaya bilər. Namizəd, siyasi partiya, siyasi partiyaların bloku seçici imzalarını toplayan şəxslə imza toplanması barədə müqavilə bağlaya bilər. Belə işin haqqı yalnız namizədin, siyasi partiyanın, siyasi partiyalar blokunun seçki fondu hesabına ödənilə bilər.
Namizədin müdafiəsi üçün seçici imzaları tədris müəssisələrində, yaşayış yerlərində, eləcə də qanunla seçkiqabağı təşviqat aparılmasının qadağan edilmədiyi digər yerlərdə toplana bilər.
İrəli sürülmüş namizədlərin qeydə alınması üçün namizəd və ya siyasi partiyanın, siyasi partiyalar blokunun səlahiyyətli nümayəndəsi səsvermə gününə ən çoxu 50 və ən azı 30 gün qalmış saat 18.00-dək DSK-lara seçki sənədlərini təqdim etməlidir
DSK imza vərəqələrini və namizədin qeydə alınması üçün lazım olan digər sənədləri qəbul etdikdən sonra 7 gün müddətində namizədin qeydə alınıb-alınmaması barədə əsaslandırılmış qərar qəbul etməlidir.
Qərar qəbul edildikdən sonra namizədin qeydə alınmasını təsdiqləyən vəsiqə verilir.
Seçkilərdə namizədin maliyyələşməsi
Seçkilərin hazırlanması və keçirilməsi xərcləri dövlət büdcəsinin vəsaiti hesabına ödənilir. Bu barədə MM seçkilərlə haqqında qanunda da qeyd edilir. Namizədlər, qeydə alınmış namizədlər, siyasi partiyalar, siyasi partiyaların blokları öz seçki kampaniyasını maliyyələşdirmək üçün xüsusi seçki fondları təşkil edirlər.
Maaşlar nə qədər olacaq?
Azərbaycanda qanunverici orqan olan Milli Məclisin sədri 2 475 manat maaş alır. Bu isə Nazirlər Kabinetinə rəhbərlik edən Baş nazirin maaşından (2 460 manat) 15 manat çox olması deməkdir. MM sədrinin birinci müavini 2 227 manat maaş aldığı halda Baş nazirin köməkçisində bu rəqəm 2 160 manatdır. (Nazirlərin maaşları barədə: http://bit.ly/2OuYvdx )
“Azərbaycan Respublikası Milli Məclisi deputatının statusu haqqında” qanunun 21-ci (Deputatın maddi təminatı) maddəsinə əsasən,
- Milli Məclisin sədri 2 475 manat;
- Milli Məclis sədrin I müavini 2 227 manat;
- Milli Məclis sədrinin müavini 2 103 manat;
- Milli Məclisin komitə sədri 1 980 manat;
- komitə sədrinin müavini 1 856 manat;
- sıravi deputat isə 1 732 manat maaş alır.
Qeyd edək ki, bu ilin mayın 1-dən etibarən maaşlar belə hesablanır.
