Dövlət Statistika Komitəsinin məlumatlarına əsasən 2017-ci ilin 8 ayında orta illik inflyasiya 14% təşkil edib. Qiymət dinamikası və inflyasiya gözləntilərinin amillərində əhəmiyyətli dəyişiklik baş verməyib.
Azərbaycan Mərkəzi Bankından (AMB) verilən məlumata görə, inflyasiyanın xarici faktorlarında yüksək volatillik qalır: “O cümlədən cari ildə dünya ərzaq qiymətlərində yüksəlmə və bəzi partnyor ölkələrdə milli valyutaların bahalaşması müşahidə olunub. Ümumi inflyasiya gözləntilərinin ayrı-ayrı məhsul qruplarının və qiymətləri dövlət tərəfindən tənzimlənən mal və xidmətlərin qiymətlərinin dəyişiminə həssaslığı qalmaqdadır”.
Tənzimləyici qeyd edir ki, inflyasiyanın qısa və orta müddətli risk amillərinin təhlili hələlik pul siyasətinə hər hansı əhəmiyyətli korreksiya zərurətini şərtləndirmir.
