Qətərin dövlətə məxsus “QatarEnergy” və İtaliyanın enerji şirkəti “Eni” arasında Qətərdən İtaliyaya ildə 1 milyon tona qədər mayeləşdirilmiş təbii qazın (LNG) tədarükü üçün uzunmüddətli müqavilə imzalanıb. “QatarEnergy”nin açıqlamasında qeyd edildiyi kimi, müqavilə 27 il müddətinə imzalanıb.
Müqavilənin şərtlərinə əsasən, LNG tədarükü 2026-cı ildə “Eni”nin 3.125% paya malik olduğu Qətərdə “North Field East” (NFE) qazının genişləndirilməsi layihəsinin bir hissəsi olaraq “North Field” yatağından alınan xammaldan istifadə etməklə başlayacaq. Qətərlə əvvəlki və mövcud müqavilələr sayəsində İtaliya təbii qaza olan tələbatının 10%-dən çoxunu təmin edəcək.
“QatarEnergy” həmçinin Hollandiyanın “Shell” və Fransanın “TotalEnergies” şirkətləri ilə oktyabrın əvvəlindən 27 il müddətinə Qətərdən LNG tədarükü üçün oxşar müqavilələr imzalayıb. Hollandiya və Fransa bu müqavilələr çərçivəsində ildə 3.5 milyon ton LNG alacaq. İyun ayında Çinin milli neft-qaz korporasiyası “CNPC” “QatarEnergy” ilə ildə 4 milyon ton LNG tədarükünə dair müqavilə imzalayıb. Müqavilənin müddəti eynidir – 27 il. Digər Çin şirkəti “Sinopec”, 2022-ci ilin noyabrında Qətər istehsalçısı ilə 27 il müddətinə ildə 4 milyon tona qədər LNG tədarükü ilə oxşar müqavilə imzalayıb. Eyni zamanda, əvvəllər Rusiya qazının ən böyük idxalçısı olan Almaniya “QatarEnergy” ilə 15 il ərzində 2 milyon ton LNG alacaq müqavilə bağlayıb.
