B2C (business-to-consumer, “istehlakçı üçün biznes”) – biznes və fiziki şəxslər arasında qarşılıqlı kommersiya əlaqəsidir. B2C bazarında bütün mal və xidmətlər birbaşa istehlakçıya satılır.

Daha sadə desək, B2C sektoruna birbaşa istehlakçıya xidmət göstərən pərakəndə satış məntəqələri, onlayn mağazalar, yeməkxanalar və restoranlar, o cümlədən əyləncə mərkəzləri daxildir.

Deyək ki, logistika şirkəti bağlamanı fərdi şəxsə çatdırdı – bu, B2C-dir. Əgər məhsul digər şirkətə çatdırıldısa, bu, B2B-dir (biznes üçün biznes).

Nüanslar

B2C bazarındakı alıcıların əksəriyyəti satın alınan məhsul və xidmətdən başı çıxan peşəkarlar və ya ekspertlər deyil. Praktiki məqsədlərlə yanaşı, bu bazarda alış-veriş etməkdə emosional komponent də mühüm rol oynayır.

B2C bazarında müəssisələr eyni tipli həllərdən və “marketinq blanklarından” istifadə etməyə meyllidirlər. Bu sektorda satış dövrü çox qısadır, “burada və indi” prinsipi ilə baş verir.

B2C satışları üçün satış nöqtələrinin harada yerləşməsi, onların ərazi əlçatanlığı və rahatlığı vacibdir. Bu xüsusiyyət onlayn ticarət və çatdırılma xidmətlərinin inkişafı ilə tədricən silinir, lakin hələ də qüvvədə qalır.

Bu seqment həm də kütləvi istehsal ilə xarakterizə olunur. Satıcı xüsusi bir müştəriyə deyil, bütün bazarın tələbinə və meyllərinə diqqət yetirir.